Выстава выцінанкі Наталлі Каньковай.

28 красавіка а 17 гадзіне ў Арт-прасторы Талстога, 7 адкрыецца выстава выцінанкі Наталлі Каньковай.

Наталля Канькова — сябра Беларускага саюза майстроў народнай творчасці і Беларускага саюза мастакоў. Працуе ў галіне дэкаратыўна-прыкладнога мастацтва (мастацкі тэкстыль, выцінанка).

На выставе прадэманстраваны праект, які ўключае ў сябе працы з некалькіх серый 2014-2023 гадоў. Наталля Канькова эксперыментуе з памерам выцінанкі (ад класічнага да вельмі вялікага), матэрыялам, роляй размяшчэння ў прасторы і сэнсавай нагрузкай. Адна з любімых тэм аўтара — раслінныя матывы, Дрэва Жыцця, птушкі. Апошнія прадстаўлены серыямі «Залатая восеньская казка», «Поўнач Белай Русі», «Дрэва Жыцця» і інш.

Арнаментальныя матывы гэтых серый у сваёй каляровай гаме стылістычна адлюстроўваюць асаблівасці віцебскага рэгіёну.

Наталля Канькова — актыўны ўдзельнік міжнародных сімпозіумаў і канферэнцый, персанальных і калектыўных выстаў. Яе работы знаходзяцца ў музеях і прыватных калекцыях Беларусі, Расіі, Украіны, Румыніі, Перу, Літвы, Латвіі.

Выстава будзе працаваць да 18 чэрвеня 2023 года.