Новая экспазіцыя ў арт-прасторы «Талстога, 7»

Выстава мастацкай фатаграфіі народнага фотаклуба “Віцьба” 1970-1980-х гг.

Віцебскі фотаклуб «Віцьба» — цікавая і ўнікальная з’ява ў культуры нашага горада і краіны. У 1970—1980-х гадах у фотаклубе сфармавалася цэлая плеяда аўтараў мастацкай фатаграфіі, якім не толькі ўдалося знайсці свой стыль, але і значна паўплываць на мастацкае жыцце Віцебска ўвогуле.

Экспазіцыя прадстаўлена імёнамі А.Глебава, Э.Такарчука, М.Шмерлінга, Г.Беліцкага, У.Базана, І.Барсукова, В.Ганчарэнкі, П.Бранштэтэра, А.Вычава, І.Лейкіна, У.Стракача, Ю.Раброва, І.Гусакова, А.Ужгародскага, В.Галубцова, В.Пыжыкава, І.Сушчэўскага, А.Гапонава, В.Слабыні, Ю.Антонава, Э.Цецярэўскага і В.Скрыпачова.

Удзельнікі фотаклуба “Віцьба” вялі калектыўны фоталетапіс. Лірычныя, эмацыйныя здымкі адлюстроўваюць паўсядзённае жыццё горада, людзей і рэчы - артэфакты мінуўшчыны.

Экспазіцыя выставы - гэта ўнікальныя і часта адзінкавыя экзэмпляры фотаздымкаў, якія на першы погляд могуць падацца стылістычна разнастайнымі. Але ёсць тое, што іх безумоўна аб’ядноўвае. Гэта дачыненне аўтараў да адзінага энергетычнага цэнтра - фотаклуба на вуліцы Маякоўскага.

У гледача ёсць цудоўная магчымасць пабачыць арыгіналы фотаздымкаў віцебскіх фатографаў з архіўных калекцый Уладзіміра Стракача, Юрыя Раброва, Аляксандра Вышкі і Віцебскага абласнога краязнаўчага музея.

Адкрыццё выставы 27 студзеня а 16 гадзіне ў арт-прасторы “Талстога, 7”.